 |
 |
Jou 9 beste vriende. Vriend 1
Jou beste Vriende.
Daar is baie dinge in hierdie lewe wat sal kom en gaan, maar daar is 'n paar dinge
wat oor en oor weer sal verskyn: Vriende, nege om presies te wees. Hierdie nege vriende
het twee kante en soms, nee meestal sien ons eers die "ander" kant van die vriend, voordat
hy sy regte kleur wys.
Hierdie vriende kom ook onder ander name, party noem hulle vrugte ander noem hulle 'Vrug',
maar wat wel seker is, is hulle is aan jou kant. Elke asemteug, elke gedagte wat hulle het
gaan oor jou.
Hulle hele rede van bestaan is gesetel in hulle ondersteuning van jou.
Hierdie nege vriende is ook die mees nagebootste entiteite op aarde. Almal probeer hulle besit,
almal beweer dat hulle hierdie vriende vir jou kan gee, dat hulle weet waar hierdie vriende bly
en hoe om daar te kom.
Maar die probleem is al hierdie is nagamaakte van die regte ding. Hulle weet dit, maar omdat
ons so dringend en desperaat is vir hierdie vriende, sal ons moor om selfs die nagemaaktes te kry.
Die "verkopers" sal aanhou om gereeld nuwe pakkies op te maak van hierdie namaaksels
want hulle weet hoe desperaat ons daarvoor is.
Vriend nommer een: Liefde.
As hierdie wereld dit kan regkry dat jy net haat ken, het hy in sy taak geslaag. Sien, liefde
is 'n prentjie van God: God is liefde. Die gedagte aan God, behoort jou te vul met liefde, maar in hierdie
wereld word ons beeld van God verdraai. En hoe meer die wereld jou 'n ander beeld van God kan laat sien
as liefde, hoe minder liefde sal jy ken. Om God te ken, is liefde. Alles sal vergaan, maar liefde nie,
hoekom nie? Want liefde is 'n mens, die liefde van God is as 'n persoon aarde toe gestuur: Jesus Christus. Alles van God is saamgevat in hierdie een mens. Hy is liefde. Ken Hom en jy ken liefde. Dan verloor al die luste en versugtinge hulle rede vir bestaan, want jy het die egte gevind, die ware Liefde. Christus.
Wat is liefde? Wat is ware liefde? Die antwoord hierop le opgesluit in jou ervaring van Christus.
Die beeld wat jy het van Christus, is die beeld wat jy het van liefde. Die twee is onskeidbaar. Jy het
lief soos wat jy Christus ken. Jou ervaring van Christus is direk gelyk aan jou kennis van liefde.
Die wereld om ons is besaai met prentjies van liefde. Skadu's van die egte, deur God gelos, sodat ons
in 'n baie klein mate 'n idee kan kry van Sy onbeskryflike, ewigdurende, onvernietigbare liefde.
'n Pa se liefde vir sy seun.
Ek praat van die gemiddelde man. Watter man sal vir sy seun 'n slang gee as Hy vir brood vra? 'n Liefde wat deur die eeue verhale geword het wat die hartsnare roer. 'n Pa en sy seun. Dit is die beeld van die oudste liefdesverhouding ooit. In elkeen van hierdie verhoudings op aarde tussen Pa's en seuns, is daar iets te sien van die Heerlikheid van die verhouding tussen God en Jesus Christus.
En ons is geroep om te deel in hierdie heerlikheid. Kan jy dit sien? Kan jy sien hoe die liefde van die
Vader vloei na die seun? Hoe die seun hierop reageer deur daardie liefde weer terug te bring na die Vader?
"Ek is lief vir U Vader, U is my alles, ek kan niks doen wat U nie spreek nie, want ek is U woord.
U is my lewe, my begin en my einde. Waar ek is U, U is my Herder, Ek kom niks kort nie. Niks kan my
skei van U liefde nie. Ek deurdrenk met U goedheid en guns. Al U goedheid, al U liefde word op my
gestort. Ek is , want U is. Ek is U eerste gedagte, U rede vir Liefhe."
'n Ma se liefde vir haar dogter
Daar is 'n dogter in hierdie verhaal, jy ken haar as die kerk, die liggaam van Christus, die Bruid van Christus. Soos een ma dit gestel het:
"My twee meisiekinders is vir my meer werd as enige-iets anders in die hele wêreld. Trixi sê een keer sy verstaan om kinders te hê, is soos om jou hart buite jou te laat rondloop. Inderdaad, beter sou ek dit nie kon beskryf nie. Hierdie band tussen my en my kinders is soos 'n fisiese string van my binnekant na beide van hulle. En om te dink ek was bang ek gaan een kind liewer hê as die ander! Nooit gesien nie. Ek't werklik nie geweet dat ek tot sulke liefde in staat is nie. En dis waar wat hulle sê: 'n Mens se kapasiteit om lief te hê is oneindig."
Joh 13:34 Ek gee julle 'n nuwe gebod: julle moet mekaar liefhê. Soos Ek julle liefhet, moet julle mekaar ook liefhê. 35 As julle mekaar liefhet, sal almal weet dat julle dissipels van My is.
Die kerk hier op aarde word geken deur die liefde wat haar lede vir mekaar het. Kom ons dink aan die liefde wat ons vir mekaar het wanneer ons alleen in ons kamer is. Hoe en wat dink jy van die ander lede in jou kerk? Hierdie is nie om te oordeel nie, dit is om te bewys dat Liefde 'n gawe van God is, jy het Lief omdat God is. Nie omdat die pastoor of dominee of die Bybel se jy moet nie, en ook nie omdat jy wil nie. God is Liefde en jy het lief omdat God in jou is.
Maar daar is nog 'n belangriker aspek van hierdie liefde, kyk bietjie hierna: Eintlik is dit die moeite werd om gereeld hierdie hoofstuk te lees, ek wil net 2 versies uitsonder. Die eerste een gaan oor waar Jesus sy naam vandaan gekry het, en ook dat hierdie naam ons beskerming is.
Joh 17:11.Ek bly nie langer in die wêreld nie, maar hulle bly nog in die wêreld. Ek kom na U toe. Heilige Vader, bewaar hulle in u Naam, die Naam wat U My gegee het, sodat hulle net soos Ons een kan wees.
Die tweede gaan oor die bekendmaking van hierdie naam.
Joh 17:26 Ek het u Naam aan hulle bekend gemaak, en Ek sal dit verder bekend maak, sodat die liefde wat U aan My bewys het, in hulle kan wees en Ek ook in hulle.
Maar kyk watter effek dit het op ons. Deur die bekendmaking van daardie naam, is God se liefde in ons soos wat dit in Christus is!. Nou hierdie is 'n raaisel met 'n enorme effek. Kyk mooi, ons hoef nog niks te gedoen het nie. Hy, Jesus Christus, maak God se naam, wat Hyself is, bekend, en deur die bekendmaking is God se liefde in ONS. Hallo, sien jy dit!!. Dit is sy werk, en om dit alles te kroon se vers 3 "En dit is die ewige lewe: dat hulle U ken, die enigste ware God, en Jesus Christus, wat deur U gestuur is."
Dit is dit. En daar is die hele Evangelie, God maak deur Christus sy naam aan jou bekend. Twee dinge gebeur. God se liefde en Christus kom woon in jou(wat eintlik een is), en omdat jy God ken, het jy die Ewige Lewe. Liefde en Lewe, jy het dit. Nou!!!
Maar daar is nog meer!!.
Kyk mooi na vers 26. Dit se "Sodat die Liefde wat U aan my bewys het." Nou dink bietjie aan hoe liefde bewys word. Nou ek kan seker probeer voorbeelde gee van waar 'n Pa sy liefde aan sy seun bewys deur 'n geskenk, of deur hom vas te hou. Maar die punt is, wat jy ontvang in jou is liefde wat BEWYS is. En jy is opgevang in die middel van daardie BEWYS, wat dit ookal beteken. Daardie liefde is dinamies, vloeiend, 'n liefde in aksie van Vader na seun, van seun na Vader, gedra deur die Heilige Gees. Jy het in jou, die ultimate vorm van "Divine Love". Iets waarna Jesus al sy dae op aarde gesmag het om weer te kan ervaar. Dit gebeur nou binne in jou. Moenie vaskyk in dit wat jy sien in jouself nie. Jy KAN NIE LIEFHE nie. Die mens is in Homself tot niks goeds in staat nie. Wat goed is, is van God, en God is in jou. Jy is vasgevang in die middel. Liefde teenoor jou naaste is Christus in jou wat deur jou, jou naaste liefhet. Jy is die stukkende kruik met 'n onmeetbare skat in jou. Laat Hom hulle liefhe. Hy wil so graag.
Kom ons gesels